آش خاصك أ سيدي بنور مهرجان أمولاي

قريبا في سيدي بنور غادا تبدا الفوضى و السيبة و غادي يختالط الحابل بالنابل و الله اعلم عدد المصائب و الكوارث لي غادين يوقعو بسبب مهرجان ماعندو حتا علاقة باسم مهرجان و البوليس غادي يتمحن مزيان حيث خاصو يحضي بالليل و بالنهار هاد الروينة و الصبيتار غادي يتدك بناس المضاربات و التفرشيخ …أصلا ملي كيغيب المش الفيران كتبدا تنقز …

دابا هوما ملي دارو شرع ايديهم…على الاقل نعرفو في إطار الحق الوصول إلى المعلومة، الميزانية الحقيقة ديال هاد المهرجان و اشنو هيا المعايير المعتمدة من طرف المشرفين عليه و شكون الشركاء ديالهم  وأشنو عاطيم ،و أهم حاجة كيفاش يكون مدير المهرجان  هو نفس الشخص المطرود من طرف المجلس و العامل السابق و علاش بالضبط يجي واحد من خارج الاقليم وينهب رزق المدينة؟؟وخاصة انه  معروف بأنه انسان لا علاقة له بالفن ولا بالتنظيم و جميع تجاربو السابقة بينات الفشل ديالو و خير دليل أن المحلس البلدي رفض يدعمو نهائيا في جميع انواع  التخربيق لي كيجيب ليهم …

هنا ممكن نطرحو مجموعة من الأسئلة :واش لمدينة مافيهاش المنظمين الشرفاء؟علاش يجي واحد ماعندوش حتا علاقة بالتنظيم و غادي يبدر زبالة ديال الفلوس؟ و لي ممكن نديرو بيها شي حويجات خاصانا وواقفين عليها…وعلاش شحال من أنشطة دازت في مستوى كبير و مدعموهاش حتا بقرعة ديال الما..

بغينا نعرفو الميزانية الحقيقة المخصصة لهاد المهرجان و بغينا نعرفو فاش غادا تصرف و شكون غادي يصرفها و الطريقة لي غادي يعتامدوها في اختيار الفقرات، و شكون الشركاء  ديالهم ..وعلاش زعما المنظمين ماداروش ندوة صحفية شرحو فيها جميع هاد التفاصيل…حيت هذا مال الشعب و فلوس ديال المواطنين و لي كون تشاور معاهم مول هاد لبلان غادي يقولو ليه  ماعندنا منديرو بهاد التخربيق ،عندنا ألف حاجة و حاجة ناقصانا…

في الاخير و ليس آخر حاجة …من هادشي كامل كاين لمخزن و كاينة المراقبة وكاين لي يفضح و كاينة المحكمة لي ترد للمدينة حقها ..و قرعة ديال الما لضاعت هباء منثورا و الله مانسامحو فيها لا في الدنيا و لا في الاخرة…
ولنا عودة الموضوع

..

قم بكتابة اول تعليق

Leave a Reply

لن يتم نشر بريدك الالكتروني في اللعن


*


− 3 = 4